बारा- बाराका पत्रकार वीरेन्द्र साहको हत्यामा संलग्न फरार एक जनालाई प्रहरीले पक्राउ गरेको छ ।

बाराको सदरमुकाम कलैयास्थित कोल्हवी-४ सपही टोलबाट हरेराम पटेललाई विहीवार दिउँसो पक्राउ गरिएको जिल्ला प्रहरी कार्यालय बाराका प्रहरी उपरिक्षक कृष्ण प्रसाद पंगेनीले बताए ।

महागढीमाई नगरपालिका वडा नं. २ तेलकुवा घर भएका पटेल लुकी छिपी बस्दै आएका थिए ।

पत्रकार साहको हत्या भएको १३ वर्ष पछि प्रहरीले पक्राउ गर्न सफल भएको छ ।

पत्रकार साहलाई तत्कालीन नेकपा माओवादीका बाराका जनसरकार प्रमुख लालबहादुर चौधरी, कुन्दन फौजदार, हरेराम पटेल सहितले २०६४ असोज १८ गते बाराको ढोडिया पिपरा बजारबाट अपहरण गरेका थिए ।

अपहरण गरेका ३४ दिन पछि साहको शव २०६४ कार्तिक २२ गते टाँगिया बस्ती जङ्गलमा गाडिएको अवस्थामा प्रहरीले फेला पारेको थियो ।