काठमाडौं- कपिलवस्तुमा हालसम्म कोरोनाका कारण ज्यान गुमाउनेको संख्या ६ पुगेको छ ।

बुधबार राति थप एक जना कोरोना संक्रमितको मृत्यु भएसँगै ज्यान गुमाउनेको संख्या ६ पुगेको हो । बुधबार मृत्यु हुनेमा कपिलवस्तु नगरपालिका- ६ का २९ वर्षीय पुरुष रहेको जिल्ला स्वास्थ्य कार्यालयले जानकारी दिएको छ ।

मिर्गौला र उच्च रक्तचापबाट बिरामी परेपछि उपचारका लागि काठमाडौं शिक्षण अस्पताल लगिएकामा यही भदौ २२ गते उनमा कोरोना पुष्टि भएको जिल्ला स्वास्थ्य कार्यालयले जनाएको छ।

उनको उपचारका क्रममा बुधबार राति मृत्यु भएको स्वास्थ्य कार्यालयका कोरोना फोकल पर्सन कुमार थापाले बताए।

जिल्लामा आज थप ४६ जनामा कोरोना पोजेटिभ पुष्टि भएको छ। यससँगै जिल्लामा कोरोना संक्रमितको संख्या एक हजार २२४ पुगेको छ।