काठमाडौँ- कमलादीमा भेटिएको भनिएको साढे १४ किलो चाँदी र आधा किलो सुन प्रकरणको अनुसन्धानका लागि प्रहरीले थप दुई सुन व्यापारीलाई पक्राउ गरेको छ।

प्रहरीले भदौ १५ गते न्यूरोडका लक्की ज्वेलर्सका श्रीनिवास उपाध्याय र अष्टमंगल ज्वेलर्सका विजय ताम्राकारलाई अनुसन्धानका लागि पक्राउ गरिएको महानगरीय प्रहरी परिसर, काठमाडौंका एसएसपी श्यामलाल ज्ञवालीले जानकारी दिए ।

तस्करहरूले आधा किलो सुन लक्की ज्वेलर्सका श्रीनिवास उपाध्यायसँग किनेको प्रहरीको दाबी छ । उपाध्यायले भने अष्टमंगल ज्वेलर्सका विजय ताम्राकारसँग किनेकाले अनुसन्धानका लागि पक्राउ गरिएको ज्ञवालीले जानकारी दिए । बैँकबाट खरिद गरिएको सुनको ढिक्का गहना नै नबनाइ विक्री गर्न नपाइनेमा उनीहरूले सुनको ढिक्कै बेचेकाले  नियन्त्रणमा लिइएको उनले बताए ।

उनीहरूसहित ११ जनालाई हिरासतमा राखेर अनुसन्धान गरिरहेको प्रहरीले जनाएको छ । अबको एक साताजतिमा  अनुसन्धान सकेर मुद्दा चलाउने तयारी भएको प्रहरीले जनाएको छ । संगठित अपराधमा अनुसन्धानका लागि ६० दिनसम्मको समय पाइने भएकाले सोही अनुरूपको अनुसन्धान गरेर दर्बिलो प्रमणसहित उनीहरूलाई मुद्दा चलाउने तयारी भएको प्रहरीले जनाएको छ ।

अहिले प्रहरी हिरासतमा इल्ताफ हुसेन अन्सारी, निलेश शाखिया, कौशल पटेल, देवानसिंह पटेल, विजय पटेल, प्रहरी जवान प्रसन्न श्रेष्ठ र उनका घरबेटी उमेश श्रेष्ठ, प्रहरी जवान बहादुरसिंह कडायत र कालिगढ मनिष छन्।

गत साउन १३ गते प्रहरीले कमलादीमा गाडी चेकजाँच गर्दै गर्दा तस्करहरू सुनचाँदी नै फालेर बा ६ च ५५१९ नम्बरको स्कार्पीयोमा भागेका थिए ।