काठमाडौं- नेपाल राष्ट्र बैंकले मंगलवारदेखि आगामी बिहीवारसम्म बैंक तथा वित्तीय संस्थाका राजस्व संकलन हुने सबै शाखा तथा काउन्टरहरु खुला गर्न निर्देशन दिएको छ ।

केन्द्रीय बैंक तथा वित्तीय संस्था नियमन विभागले सोमवार सूचना जारी गर्दै बैंक तथा वित्तीय संस्था र नेपाल क्लियरिङ हाउस लिमिटेडलाई राजस्व संकलनका लागि तीन दिनसम्म शाखा तथा काउन्टरहरु खुला गर्न निर्देशन दिएको हो ।

सरकारले भदौ २५ सम्म राजस्व तिरिसक्न करदाताहरुलाई भनेको छ । राजस्व उठाउने म्याद नजिकिदै गएको भन्दै केन्द्रीय बैंकले ती संस्थाका शाखा कार्यालयहरु खुला गर्न निर्देशन दिएको हो ।

कोरोना महामारीपछि निषेधाज्ञा लागू गरिएका कारण अहिले बैंक तथा वित्तीय संस्थाका सिमित शाखाहरु केहि साता अघिदेखि सञ्चालनमा रहेका छन् ।

सिमित शाखामात्रै खोल्दा भीड अत्यधिक हुने भन्दै सहज तरिकाले राजस्व तिर्ने वातावरण बनाउन निर्देशन जारी गरिएको सूचनामा केन्द्रीय बैंकका कार्यकारी निर्देशक देवकुमार ढकालले भनेका छन् ।

बैंकद्वारा जारी विज्ञप्ति