काठमाडौं – व्यक्ति अपहरणको आरोपमा विप्लव समूहका एकजना नेतालाई प्रहरीले काठमाडौंबाट पक्राउ गरेको छ ।

सिन्धुलीको तिनपाटन गाउँपालिकामा रहेको भिमसेन नि.मा.वि.का प्रधानाध्यापक नारायण भण्डारीको अपहरणमा संलग्न आरोपमा प्रहरीले विप्लव समूहका सिन्धुली जिल्ला समिति सदस्य राजिव सुनुवारलाई पक्राउ गरेको हो ।

जिल्ला प्रहरी कार्यालय सिन्धुलिकी एसपी रञ्जु सिग्देलका अनुसार सुनुवारलाई काठमाडौंको बौद्धबाट पक्राउ गरिएको हो ।

भदौ १३ मा छात्रवृत्ति वितरणको तयारी भईरहेको बेला प्रअ भण्डारीलाई करिब एक दर्जनको समूहमा आएका विप्लवका कार्यकर्ताले अपहरण गरेको एसपी सिग्देलले बताईन् । उनलाई गाउँलेले महभीरको जंगलबाट अपहरणमुक्त गरेका थिए ।

राजिवसहित प्रअ अपहरणमा संलग्न अन्य ९ जना पक्राउ परेका छन् । उनीहरुलाई अपहरण तथा विष्फोटक पदार्थ मुद्दामा म्याद लिएर अनुसन्धान भइरहेको प्रहरीले जनाएको छ ।