काठमाडौँ-  वरिष्ठ अधिवक्ता डा.भीमार्जुन आचार्यले संघीय संसद्को एक कार्यकालमा एउटै व्यक्ति दुई पटक सांसद् हुन नपाउने बताएका छन् ।

डा.युवराज खतिवडालाई फेरि राष्ट्रियसभा सदस्यमा दोहोर्‍याउन खोजिएका समाचारहरू सार्वजनिक भएपछि वरिष्ठ अधिवक्ता आचार्यले त्यसैप्रति लक्षित गर्दै यस्तो टिप्पणी गरेका हुन् ।

समाजिक सञ्जाल ट्वीटरमा ट्वीट गर्दै आचार्यले भनेका छन्,’ संघीय संसद अर्थात् प्रतिनिधिसभा वा राष्ट्रियसभाको एक कार्यकालमा एउटै ब्यक्ति दुई पटक संसद् सदस्य हुन पाउने व्यवस्था संविधानले कहीँकतै गरेको छैन । यो संसदीय अभ्यास पनि होइन ।’

उनले खतिवडालाई इंगित गर्दै पटक/पटक असफल भएका व्यक्तिलाई सरकारले कसको स्वार्थमा गैरसंवैधानिक कसरत गर्दैछ भन्दै प्रश्न उठाएका छन् ।

‘कसको स्वार्थमा पटक पटक असफल भैसकेको ब्यक्तिका लागि सरकारले गैरसंवैधानिक कसरत गर्दैछ, बुझ्न सकिएन,’ आचार्यले लेखेका छन्, ‘देशको सम्पूर्ण अर्थतन्त्र र ब्यवस्था नै विदेशी ॠणमा चलाउने खतरनाक योजनाबाट मुलुकलाई बचाउन पहल गरौँ।’

संघीय संसद् अर्थात् प्रतिनिधि सभा वा राष्ट्रिय सभाको एक कार्यकालमा एउटै ब्यक्ति दुई पटक संसद् सदस्य हुन पाउने व्यवस्था संविधानले कहीँकतै गरेको छैन । यो संसदीय अभ्यास पनि होइन । कसको स्वार्थमा पटक पटक असफल भैसकेको ब्यक्तिका लागि सरकारले गैह्र संवैधानिक कसरत गर्दैछ, बुझ्न सकिएन ।

— Bhimarjun Acharya (@BhimarjunPhD) September 3, 2020

राष्ट्रियसभा सदस्यमा पहिलो कार्यकाल सकिएर सांसद् नै नभई खतिवडाले अर्थमन्त्रीको रूपमा ६ महिनाको कार्यभार यही भदौ २० मा पूरा गर्दैछन् ।