काठमाडौं– युनाइटेड अरब इमिरेट्स (यूएई) विरुद्ध एकदिवसीय अन्तर्राष्ट्रिय तथा ट्वान्टी—२० श्रृङ्खला २—१ ले जितेको नेपाली राष्ट्रिय क्रिकेट टोलीलाई राष्ट्रपति बिद्यादेवी भण्डारीले बधाई दिएकी छन् ।

सोमबार राष्ट्रिपति भण्डारीले नेपाली टोलीले ऐतिहासिक सफलता हात पारेको उल्लेख गर्दै बधाई दिएकी हुन् । “नेपालले यूएईमा भएको तेस्रो ट्वान्टी—२० क्रिकेट खेलमा ऐतिहासिक सफलता हासिल गरेकोमा राष्ट्रिय क्रिकेट टिमलाई हार्दिक बधाई दिँदै उत्तरोत्तर प्रगतिको कामना गर्दछु,” राष्ट्रपति भण्डारीको ट्वीटर ह्यान्डलमा भनिएको छ, “हाम्रो देशमा लोकपृय बनेको क्रिकेट खेलको प्रवद्र्धनका लागि शैक्षिक प्रतिष्ठान र सम्वद्ध पक्ष अग्रसर हुने अपेक्षा लिएको छु ।”

यूएईमा सम्पन्न एकदिवसीय अन्तर्राष्ट्रिय तथा ट्वान्टी—२० अन्तर्राष्ट्रियमा २—१ को जित निकालेको नेपाली टोली सोमबार स्वदेश फर्किइसकेको छ । ऐतिहासिक सफलता हासिल गर्दै स्वदेश फर्किएको राष्ट्रिय टोलीको त्रिभुवन बिमानस्थलमा रातो कार्पेटसहित भव्य स्वागत गरिएको थियो ।