कपिलवस्तु – खेतमा पानी लगाउने विषयमा झगडा हुँदा कपिलवस्तुको महाराजगञ्जमा ५ जना घाइते भएका छन् ।

जिल्ला प्रहरी कार्यालय कपिलवस्तुका अनुसार, महाराजगञ्ज नगरपालिका–४ का कृषकहरु आफ्नो खेतमा पानी लगाउने पालोका विषयमा कुरो नमिलेपछि झगडा पर्दा ५ जना घाइते बनेका हुन् ।

झगडामा महाराजगञ्ज ४ का ५० वर्षीय मोहमद हुसेन, २८ वर्षीय अल्ताप हुसेन र ७५ वर्षीय सलिम गद्दी घाइते भएका छन् ।

यसैगरी झगडा गर्दा अर्को पक्षका सोही ठाउँका ४५ वर्षीय जुमन मिया र ४० वर्षीया जाहेदा मिया घाइते भएका छन्।

प्रहरीका अनुसार, घाइते मध्ये ३ जनाको स्थानीय शिवराज अस्पताल बहादुरगंजमा सामान्य उपचारपछि थप उपचार गर्न कपिलवस्तु जिल्ला अस्पतालमा पठाइएको छ ।