एजेन्सी – अमेरिकाको पोर्टल्याण्डमा जारी प्रदर्शन हिंसात्मक बनेपछि अमेरिकी राष्ट्रपति डोनल्ड ट्रम्प र उनका प्रतिस्पर्धी जो बाइडनबीच  आरोप-प्रत्यारोप चलेको छ ।

ट्रम्पले पोर्टल्याण्डका डेमोक्र्याट मेयर टेड विलरले गर्दा हिंसा चर्किएको भन्दै ‘पोर्टल्याण्डमा मृत्यु र विध्वंशको बाटो खोलेको’ आरोप लगाएका छन्।

बाइडनले भने राष्ट्रपति ट्रम्पले ‘गैरजिम्मेवार तरिकाले हिंसाका लागि मानिसहरूलाई उकासेको र अमेरिकामा ‘घृणा र विभाजनको आगो फुकेको’ आरोप लगाएका छन् ।

आइतवार चरणबद्ध ट्वीट गरेका ट्रम्पले ‘मूर्ख मेयरसँग पोर्टल्याण्डले कहिल्यै पूरानो स्वरूप नपाउने’ बताएका थिए। उनले त्यहाँ केन्द्रबाट सुरक्षाफौज पठाउने चेतावनी पनि दिएका छन् ।

ट्रम्पले बाइडनलाई ‘नेतृत्व गर्न र अपराधविरुद्ध बोल्न नचाएको’ आरोपसमेत लगाएपछि बाइडनले ट्रम्पलाई विज्ञप्ति नै निकालेर जवाफ दिएका छन् ।

‘ट्रम्पलाई कानुनीराजबारे ट्वीट गरेर आफूलाई बलियो देखाउन सकिन्छ भन्ने लाग्दो हो । तर, आफ्ना समर्थकलाई द्वन्द्व रोक्न आह्वान गर्न नसक्नुले उनी कति कमजोर छन् भन्ने देखाउँछ,’ बाइडनले निकालेको विज्ञप्तिमा भनिएको छ ।

शनिवार अमेरिकामा ट्रम्प समर्थक र ब्ल्याक लाइभ्स म्याटर अभियानका सहभागीबीच झडप हुँदा एकजना श्वेत प्रदर्शनकारीको मृत्यु भएको छ । त्यसलगत्तै त्यहाँ प्रदर्शनहरू अझ चर्किएका छन् ।

जोर्ज फ्लोईडको गत मे २५ मा प्रहरी नियन्त्रणमा मृत्यु भएपछि पोर्टल्याण्डमा तीन महिनादेखि रंगभेदविरोधी प्रदर्शन चर्किदै आएका छन् ।