काठमाडौं- इन्डियन प्रिमियर लिग (आईपीएल) खेल्न युएई पुगेको चेन्नई सुपर किंग्सका केहि खेलाडीसहित सपोर्ट स्टाफका सदस्यहरुलाई कोरोना पोजेटिभ देखिएको छ ।

क्रिकइन्फोका अनुसार विहीबार गरिएको परिक्षणमा चेन्नईका १२ सदस्य संक्रमित भएको जनाइएको छ । संक्रमित हुनेमा एक जना भारतीय राष्ट्रिय टिमबाट खेल्ने तीब्र गतिका बलर समेत रहेका छन् ।

आईपीएल प्रोटोकल अनुसार आईपीएल खेल्ने खेलाडी र सपोर्ट स्टाफको युएई विमानस्थलमा पहिलो टेस्ट हुन्छ भने होटलमा क्वारेन्टाइन बस्दा पहिलो, तेस्रो र पाँचौ दिन गरेर ६ दिनको क्वारेन्टाइन अवधिमा तीन पटक परिक्षण हुने बताइएको छ ।

चेन्नईका १० जनालाई पाँचौ दिनको दिन गरिएको तेस्रो राउण्डको परिक्षणमा पोजेटिभ देखिएको हो ।

योसँगै चेन्नईको टिमको क्वारेन्टाइन अवधि बढाईएको बताइएको छ भने उनीहरुको ट्रेनिंग समेत अहिले स्थगित गरिएको छ । चेन्नईको टिम अगस्त २१ मा दुबई पुगेको थियो ।

यस सिजनको आईपीएल सेप्टेम्बर १९ देखि नोभेम्बर १० सम्म हुँदैछ । आईपीएलका खेल युएईका तीन शहर आबुधाबी, शारजाह र दुबईमा खेलिने भएको छ ।