बुटवल– लुम्बिनी प्रादेशिक अस्पतालको कोरोना विशेष अस्थायी अस्पतालमा दुई जना संक्रमित बिरामीको मृत्यु भएको छ । मृत्यु हुनेमा ६७ वर्षीया महिला र ३८ वर्षीय पुरुष रहेका छन् ।

लुम्बिनी प्रादेशिक अस्पतालका सूचना अधिकारीले जारी गरेको विज्ञप्तिअनुसार गत साउन ३१ गते भर्ना भएकी ती महिलामा श्वासप्रश्वास, उच्च रक्तचाप र मृगौला सम्बन्धी रोग थियो । उनमा कोरोना पोजेभिट देखिएको थियो ।

यसैगरी रुपन्देहीकै समरीमाई गाउँपालिका–२, मुडुलाका ती पुरुष कोरोना पोजिटिभ देखिएपछि भदौ १ गते अस्पताल भर्ना भएका थिए । दुवै जना कोरोना विशेष अस्थायी अस्पतालको आइसियु भेन्टिलेटरमा उपचारमा रहेकोमा महिलाको आज अपराह्न १ बजे र पुरुषको १ बजेर १० मिनेटमा मृत्यु भएको जनाइएको छ ।

यसैबीच, समुदाय स्तरमा कोरोना संक्रमण बढ्न थालेपछि रुपन्देहीमा लकडाउन एक हप्ता थपिएको छ । जिल्ला स्तरीय कोभिड–१९ नियन्त्रण तथा रोकथाम केन्द्रको बैठकले कोरोना रोकथाम र नियन्त्रणको लागि भदौ १४ गते राति १२ बजेसम्म लकडाउन गर्ने निर्णय गरेको रुपन्देहीका प्रमुख जिल्ला अधिकारी महादेव पन्थले जानकारी गराएका छन् ।

यसअघि जिल्ला प्रशासन कार्यालय रुपन्देहीले भदौ २ गतेदेखि आज राति १२ बजेसम्म लकडाउन गर्ने निर्णय गरेको थियो । लकडाउनको समयमा अत्यावश्यक सेवाका सवारीसाधन बाहेक अन्य सवारी साधनमा रोक लगाइएको छ । पसल खोल्न र हिडँडुल गर्न निषेध गरिएको छ ।