कास्की – पोखराको पस्याङ्मा सवारी दुर्घटना हुँदा मोटरसाइकलमा गस्ती गरिरहेका दुई जना प्रहरीको ज्यान गएको छ ।

ग१ब ३६९ नम्बरको मोटरसाइकलबाट गस्ती गरिरहेका प्रहरीलाई ग २ च २६२६ नम्बरको बोलेरो जीपले ठक्कर दिँदा उनीहरुको मृत्यु भएको जिल्ला प्रहरी कार्यालय कास्कीका प्रवक्ता प्रहरी नायव उपरीक्षक सुवास हमालले जानकारी दिए ।

हमालका अनुसार दुर्घटनामा परेका प्रहरी जवान पाल्पा घर भएका २० वर्षका चन्द्रबहादुर बगालेको घटनास्थलमै मृत्यु भएको हो । प्रहरी हवल्दार ३४ वर्षीय डम्बरबहादुर थारुको भने उपचारको क्रममा मृत्यु भएको छ ।

उनीहरु दुवै वडा प्रहरी कार्यालय बैदाममा कार्यरत थिए । जीप चालक धादिङ जिल्ला धुनीबेशी गाउँपालिका–५ घर भई कास्कीको पोखरा महानगरपालिका–२३ बस्ने विशाल केसीलाई प्रहरीले नियन्त्रणमा लिएको छ ।