काठमाडौं – निर्वाचन आयोगमा नेकपा (एमाले) दर्ता भएको छ । नेकपाभित्र विवाद उत्पन्न भइरहेका बेला दल दर्ताको निवेदन परेसँगै प्रधानमन्त्री तथा नेकपा अध्यक्ष केपी शर्मा ओलीले पार्टी फुटाउन दल दर्ता गर्न खोजेको भन्दै शीर्ष नेताहरुले विरोध जनाएका थिए ।

दलले गत असारमा सन्ध्या तिवारी अध्यक्ष रहने गरी दर्ताका लागि निर्वाचन आयोगमा निवेदन दिएको थियो । उक्त दर्तापछि नेकपाभित्र थप विवाद उत्पन्न भएको थियो ।

निर्वाचन आयोगले उक्त नामको पार्टीलाई वैधता दिएको हो ।

नेकपाका अध्यक्ष प्रचण्डले यो पार्टी अर्का अध्यक्ष केपी शर्मा ओलीको इशारामा दर्ता हुन लागेको बताएका थिए ।

आयोगका प्रवक्ता राजकुमार श्रेष्ठले दल दर्ता गर्ने निर्णय भएको जानकारी दिए । पार्टीका तर्फबाट निर्वाचन आयोगमा बुझाइएका कागजपत्रका आधारमा हस्ताक्षर प्रमाणित भएपछि आयोगले दल दर्ता गर्ने निर्णय गरेको हो ।

नवगठित पार्टी नेपालको १३२ औं पार्टी बनेको छ । उक्त दलमा अध्यक्षमा सन्ध्या तिवारी र महासचिव मनिषकुमार उपाध्याय छन् ।