काठमाडौं – स्पेनिस क्लब बार्सिलोनाको नयाँ प्रशिक्षकमा रोनाल्ड कोइम्यान नियुक्त भएका छन्।

बुधबार बार्सिलोनाले कोइम्यानसँग २०२२ जुन ३० सम्मका लागि सम्झौता गरेको जनाएको छ । गएको जनवरीमा प्रशिक्षक नियुक्त भएका क्वीकी सेटिनलाई बार्सिलोनाले बर्खास्त गरेपछि कोइम्यान क्लबमा भित्रीएका हुन्।

च्याम्पियन्स लिगको क्वाटरफाइनल खेलमा जर्मन क्लबसँग ८-२ को लज्जास्पद हार व्यहोरेपछि क्लबको पहिलो बर्खास्तीमा मुख्य प्रशिक्षक सेटिन परेका हुन्।

उनको कार्यकालमा बार्साले स्पेनिस लिगमा समेत नराम्रो हार व्यहोर्नुपरेको थियो। कोइम्यानले नेदरल्यान्डको राष्ट्रिय टोलीमा प्रशिक्षकको भूमिका निभाइसकेका छन् । ५७ वर्षीय उनले २ वर्षको नेदरल्यान्डससँगको सम्झौता सकिएपछि बार्सासँग आवद्ध भएका हुन्।

बार्सिलोनाबाट सन् १९८९ र १९९५ मा खेलेका उनी अहिले मुख्य प्रशिक्षकको भूमिकामा स्पेन फर्किएका हुन्।