बुटवल– रुपन्देहीको तिलोत्तमा नगरपालिकाले नगरक्षेत्रका सबै बैंक, वित्तीय संस्था र सहकारी संस्थाहरूलाई भदौ १० गतेसम्म नगद कारोबार बन्द गरेर कोरोना भाइरस संक्रमण न्युनीकरणमा सहयोग गर्न आग्रह गरेको छ ।

नगरपालिका क्षेत्रभित्र समुदायमा समेत कोरोना भाइरस संक्रमण सुरु भएको कारण जनाउँदै नगरपालिकाले आज साउन ३२ गतेदेखि नै कारोबार बन्द गर्न आग्रह गरेको छ ।

कोरोना संक्रमणबाट बच्न र बचाउन उक्त निर्णय गरेको नगरपालिकाद्वारा आइतबार जारी विज्ञप्तिमा जनाइएको छ । प्रदेश ५ को अस्थायी राजधानी समेत रहेको बुटवल उपमहानगरपालिका भदौ ५ गतेसम्म लकडाउन छ ।

प्रदेश ५ को अस्थायी राजधानी रहेको बुटवल उपमहानगरपालिकाले पनि बैंक तथा वित्तीय संस्थाहरूमा बढी संक्रमण देखिएकाले आइतबारदेखि लागु हुने गरी बैंक तथा वित्तीय संस्थाहरुलाई अनलाइन बाहेकका सबै सेवाहरु बन्द गर्न अनुरोध गरेको छ ।

यसैगरी, बुटवल उपमहानगरपालिकामा ३ जना अधिकृतसहित ४ जना कर्मचारीमा कोरोना संक्रमण पुष्टि भएपछि उपमहानगरपालिकाले स्वास्थ्य, सरसफाइ र दमकल सेवाबाहेक सबै सेवाहरु बन्द गरेको छ ।

उपमहानगरपालिकामा प्रवेश निषेध गरिएको छ । अर्को सूचना जारी नभएसम्म स्वास्थ्य, दमकल र सरसफाइ बाहेकका काम बन्द गरिएको उपमहानगरपालिकाका प्रमुख प्रशासकीय अधिकृत चक्रपाणि शर्माले बताए ।