काठमाडौं – रिलिज भएलगत्तै हिन्दी फिल्म ‘गुञ्जन सक्सेनाः द कार्गिल गर्ल’ विवादमा तानिएको छ ।

बिहीवार भारतीय वायु सेनाले फिल्मका केही दृश्यमा नकारात्मक प्रचार गरिएको भन्दै सेन्ट्रल बोर्ड अफ फिल्म सर्टिफिकेसनमा पत्र पठाएको हो ।

सेनाले उक्त पत्र नेटफिल्क्स र धर्मा प्रोडक्सनलाई पनि पठाएको जनाइएको छ । पत्रमा धर्मा प्रोडक्सनले भारतीय वायु सेनालाई जिम्मेवार रुपमा प्रस्तुत गर्ने अनुमति पाएको तर फिल्ममा त्यस्तो नदेखिएको उल्लेख छ ।

फिल्ममा वायु सेनालाई नकारात्मक प्रमाणित गर्न खोजिएको सेनाले आरोप लगाएको छ ।

फिल्ममा लैंगिक विभेदको कुरा उठाइएको र वायु सेनामा लैंगिक विभेद नहुने कुरा पत्रमा उल्लेख गरिएको भारतीय मिडियाले जनाएका छन् ।

फिल्म प्रदर्शनअघि पनि विवादमा रहेको थियो । जसकारण फिल्मको क्रेडिट लाइन हटाइएको थियो ।

जाह्नवी कपूरको शीर्ष भूमिका रहेको यो फिल्म नेपोटिज्मका कारण विवादमा परेको थियो । करण जोहरले निर्माण गरेको फिल्ममा स्टार किड्स जाह्नवी कपूरको शीर्ष भूमिका थियो ।

भारतीय फिल्म क्षेत्रमा पछिल्लो समय स्टार किड्सका फिल्मलाई दर्शकले समर्थन नगर्ने गरेका छन् ।