काठमाडौँ – कोरोना भाइरसको महामारी बढेपछि सरकारले भर्चुअल माध्यमबाट हुने कामलाई सूचारू राख्दै बाँकी कामलाई लगभग बन्द गर्न आह्वान गरेको छ ।

महामारीलाई ध्यानमा राख्दै सरकारले सम्भावित जोखिमबाट जोगिन सम्भव भएसम्म सबै क्षेत्रको काम भर्चुअल माध्यमबाट गर्न आह्वान गरेको हो ।

सरकारी तथा गैरसरकारी निकाय, बैंक, सहकारी, लघुवित्त संघसंस्थालगायत जनसम्पर्क हुने कार्यालयको कामलाई पनि विद्युतीय बनाउन सरकारले आग्रह गरेको छ ।

प्रधानमन्त्री तथा मन्त्रिपरिषद्को कार्यालयले गत २६ साउन (मंगलबार)को मन्त्रिपरिषद् बैठकको निर्णय कार्यान्वयनका लागि सरोकारित निकायलाई बुधबार गरेको परिपत्रमा भरसक घरबाटै काम गर्ने र उपस्थित हुनै पर्ने ठाउँमा ५० प्रतिशत कर्मचारीबाट काम चलाउने व्यवस्था मिलाउन आग्रह गरेको छ ।

यस्तै, अनलाइन, भर्चुअल वा विद्युतीय माध्यमबाट सेवा प्रवाह गर्न सम्भव नहुने र बढी जनसम्पर्क हुने कार्य अर्को निर्णय नभएसम्मका लागि स्थगित गर्न सरकारले निर्देशन दिएको छ ।