काठमाडौँ – कोरोना भाइरसको महामारी बढ्दै गएपछि केन्द्र सरकारले भदौ १ देखि सञ्चालन गर्ने भनिएका कतिपय सेवालाई पनि तत्काल सुरू नगर्ने तयारी गरेको छ ।

महामारीबाट जोगिन समूहमा भेला नहुन, दूरी कायम गर्न, मास्क र स्यानिटाइजरको प्रयोग गर्न तथा बेलाबेलामा साबुन पानीले हात धुन सरकारले पटक/पटक आह्वान गरिरहेको छ ।

तर, बागमती प्रदेशका आर्थिक मामिला तथा योजना मन्त्री कैलाश ढुंगेल भने सरकारीस्तरबाटै भएका आह्वानलाई बेवास्ता गर्दै दर्जनौँ मानिस सहभागी कार्यक्रममा सरिक भएका छन् ।

सरकारले २५ जनाभन्दा बढी भेला भए कारबाही गर्ने तथा बिना मास्क हिड्ने सर्वसाधारणलाई जरिवानासमेत गरिरहँदा ढुंगेल भने दलबलका साथ गृह जिल्ला रामेछापमा एक सयभन्दा बढी मानिसहरू सहभागी भएका कार्यक्रममा सरिक भएका छन् । जहाँ उनले मास्क नै नलगाएको पाइएको छ ।

मास्क लगाउँदा पनि उनले च्यूडोतिर लगाएर सरकारी आह्वान र महामारीको बेवास्ता गरेको पाइएको छ ।

शनिबार रामेछापको खाँडादेवी गाउँपालिका वडा नम्बर ६ को निर्माणाधिन बुद्धको प्रतिमा र शिवको मूर्तिमा धर्मगुरूले प्राण प्रतिष्ठा भर्ने कार्यक्रममा सरिक भएका ढुंगेलले महामारीबाट जोगिनबारे गरिएका आह्वानको सामान्य पालनासमेत नगरेको पाइएको हो ।

शनिबार नै उनले खाँडादेवी गाउँपालिकाको गाल्पामा निर्माण गर्न लागिएको कभर्डहलको पनि शिलान्यास गरेका छन् ।

उक्त कार्यक्रममा सरिक भएका उनलाई एकसय भन्दा बढीले स्वागत गरेका थिए । उनको स्वागतार्थ उपस्थित भएकाहरूले मास्क प्रयोग गरे पनि ढुंगेलले भने मास्क च्यूडोतिर लगाएका थिए ।

ढुंगेलले शिलान्यास गरेसँगै बागमती प्रदेश सरकारबाट विनियोजित १ करोड १० लाख रुपैयाँमा कर्भड हल निर्माणको काम शुरू भएको छ ।