मुम्बई – बलिउड अभिनेता सुशान्त सिंह राजपूतको निधनपछि बलिउडमा विभिन्न विषयमा बहस भइरहेको छ । प्रहरीले सुशान्तले आत्महत्या गर्नुको कारण पत्ता लगाउने प्रयास गरिरहेको छ ।

सुशान्त केशमा कलाकार रिया चक्रवर्तीलाई पनि शंकाको घेरामा तानिएको छ । उनीविरुद्ध सुशान्तका पिताले उजुरी दिएका छन् ।
रिया प्रहरीको खोजी सूचीमा थिइन् । र, उनी फरार भएको भनिएको थियो ।

भारतीय मिडियाका अनुसार रिया चक्रवर्ती आफ्नो मुम्बईको अपार्टमेन्टमा आएकी छिन् । केही समय लुकेर बसेपछि उनी अपार्टमेन्टमा देखिएकी हुन् ।

यसअघि बिहार प्रहरीले रियाको खोजी थालेको थियो । उनको मोबाइलमा सम्पर्क गर्न खोज्दा पनि फोन सम्पर्क हुन सकेको थिएन ।

रियाले बिहार प्रहरीको साटो मुम्बई प्रहरीले अनुसन्धान गरोस् भन्दै याचिका दायर गरेकी थिइन् । बिहार प्रहरीले भने रियाको खोजी भइरहेको बताएको छ ।

रियाले सुशान्तको बैंकबाट करोडौं रुपैयाँ झिकेको र मानसिक तनाव दिएर मन बाध्य पारेको परिवारले आरोप लगाएको छ । रियाले भने सत्यको जीत हुने र सुशान्तको परिवारले आफूलाई फसाउन खोजेको दाबी गरेकी छिन् ।

गत १४ जुनमा मुम्बईस्थित एक फ्ल्याटमा सुशान्तले घाँटीमा पासो लगाएर आत्महत्या गरेका थिए । आत्महत्याको कारण प्रहरीले अझै पत्ता लगाउन सकेको छैन ।