काठमाडौं- गोकर्णेश्वर नगरपालिका १ बाराहीचोकका ९ महिने बालकको मुटुको शल्यक्रिया गर्न आर्थिक सहयोग प्रदान गरिएको छ ।

‘लायन्स क्लब अफ सुन्दरीजल र ‘गरिब तथा अनाथ बालबालिकाका लागि सहयोगी हातहरू’ दुई सामाजिक संस्थाले साढे २४ हजार रुपैयाँ आर्थिक सहयोग वितरण गरेका हुन् ।

मुटुको समस्या देखिएका तामाङको शल्यक्रिया गर्न आर्थिक अभाव भएपछि परिवारले सहयोग आह्वान गरेको थियो ।

नाबालक अवस्थामै मुटुमा समस्या देखिएपछि बालकको उपचार गर्न सहयोग होस भन्ने उद्देश्यले २४ हजार ५०५ रुपैयाँ सहयोग गरिएको लायन्स क्लब अफ सुन्दरीजलका अध्यक्ष श्याम श्रेष्ठले बताए ।

एक व्यक्ति वा संस्थाको सानो सहयोग पीडित बालकको उपचार गर्न ठूलो राहत हुने गरिब तथा अनाथ बालबालिकाका लागि सहयोगी हातहरु संस्थाका अध्यक्ष उमेश पण्डितले बताए ।