काठमाडौं– मुख्य विपक्षी दलका नेता शेरबहादुर देउवाले कोरोना भाइरस संक्रमण नियन्त्रणका लागि स्वास्थ्य सामग्री खरिद गर्दा भएको अनियमितता तथा भ्रष्टाचारको उचित छानविन गर्न प्रधानमन्त्री केपी शर्मा ओलीलाई सुझाब दिएका छन् ।

देउवाले कोरोना भाइरस संक्रमण नियन्त्रणको काममा सरकारबाट भएका कमीकमजोरीको समीक्षा गर्न र प्रभावकारी कदम चाल्न पनि सुझाब दिएका छन् ।

आज प्रधानमन्त्री निवास बालुवाटारमा प्रधानमन्त्री ओलीले आयोजना गरेको विपक्षी दलका नेतासहित सरकारी अधिकारी र विज्ञहरूसँगको छलफलमा देउवाले उक्त सुझाब दिएका हुन् ।

देउवाले स्वास्थ्य सामग्री खरिदमा भ्रष्टाचार गर्नेहरूमाथि कडा कारबाही गर्न प्रधानमन्त्रीलाई सुझाब दिए । उनले पीसीआर परीक्षणको दायरा बढाउन पनि भनेका छन् । उनले विज्ञहरूका सुझाब कार्यान्वयन गर्न पनि प्रधानमन्त्रीलाई सुझाब दिए ।

देउवाले विदेशमा रहेका नेपाली कामदारहरूको उद्धार र इनफ इज इनफका अभियन्ताको भोकहडतालका विषयमा पनि प्रधानमन्त्रीको ध्यानाकर्षण गराएका थिए ।

आफ्नो भनाइ राखेर देउवा बाहिरएका थिए । बाहिरिने क्रममा उनले सञ्चारकर्मीहरूसँग संक्षिप्त कुरा गर्दै प्रधानमन्त्रीलाई आफ्नो सुझाब दिएको तर कार्यान्वयन गर्ने नगर्ने प्रधानमन्त्रीकै हातमा रहेको बताए ।