भादगाउँ– नेपाली कांग्रेसका महामन्त्री डा. शशाङ्क कोइरालाले कांग्रेसभित्रको गुट उपगुट अन्त्य हुनुपर्ने बताएका छन् ।

नेपाली कांग्रेस मध्यपुरथिमि नगरसमितिले नयाँ वर्ष २०७६ तथा प्रसिद्ध बिस्काःजात्राको अवसरमा छ्वासटोलमा शनिवार आयोजित शुभकामना आदानप्रदान तथा चियापान कार्यक्रममा बोल्दै महामन्त्री कोइरालाले कांग्रेस एक भएर अघि बढ्ने हो भने आगामी चुनावमा ठूलो दल बन्न कसैले रोक्न नसक्ने दाबी गरे । उनले भने, “नेपाली कांग्रेस एकताबद्ध भएर अघि बढेमा आगामी निर्वाचनमा मुलुकको ठूलो दल बन्न कसैले रोक्न सक्दैन् ।”

“बिपीले देखाएको बाटो कांग्रेसले विर्सन हुन्न”, महामन्त्री डा कोइरालाले भने, “राष्ट्रिय मेलमिलापको नीति अङ्गालेको कांग्रेसभित्र नै मेलमिलाप नहुन दुःखद हो ।”

उनले सरकारको गतिविधि सङ्घीयता विरोधी भएको आरोप लगाउँदै “मुलुक अप्ठ्यारो अवस्थामा पुगेको बेला दुई तिहाईको सरकार सबै अधिकार आफैं राख्ने प्रयत्न गर्देछ, जुन सङ्घीयता विरोधी छ, यसले सरकार सङ्घीयतामा विश्वास गर्दैन भन्ने देखाएको छ”, भने ।

सरकारको एकवर्षे कामको मूल्याङ्कन गर्दै महामन्त्री डा कोइरालाले भने, “सरकारको एकवर्षे कार्यकालमा धन्यवाद दिने खालको एउटा पनि काम भएको छैन । सरकारले काम गर्ने ठोस् योजना पनि प्रस्तुत गर्न सकेको छैन । मुलुकमा शान्ति सु–व्यवस्था हुनुको सट्टा हत्या, हिंसा, बलात्कार, भ्रष्टाचारका घटना वृद्धि भएका छन् ”

कांग्रेस केन्द्रीय सदस्य एवं केन्द्रीय अनुशासन समितिका संयोजक भिष्मराज आङ्दम्बेले दुई तिहाइ बहुमतको सरकारले पनि आदिवासी जनजाति, मधेशी, थारु, महिलालगायतको असन्तुष्टिलाई सम्बोधन गर्न नसकेको उल्लेख गर्दै लोकतान्त्रिक मूल्य मान्यताको प्रवद्र्धनमा सररकार गम्भीर नभएको आरोप लगाए ।