एजेन्सी – दुई यात्रीसहितको अमेरिकी अन्तरिक्ष यान २ महिनापछि पृथ्वीमा फर्किएको छ ।

बब बेन्कन र डग हर्ली नाम गरेका दुई यात्रीसहितको स्पेस एक्स ड्रयागन क्याप्स्यूल नामक अन्तरिक्ष यान समुन्द्रमा अवतरण गराइएको छ ।

४५ वर्षअघि अपोलो कमान्ड मोड्युल नामको यानपछि पहिलो पटक अर्को मानवसहितको अर्को यान पानीमा अवतरण गराइएको बीबीसीले जनाएको छ ।

उक्त यान अवतरणका क्रममा चार प्यारासुट प्रयोग गरिएका थिए । जसले प्रतिघण्टा ५६० किलोमिटर गतिको यानलाई समुद्र छुने बेला करिब २४ किलोमिटर प्रतिघण्टामा सीमित गरेको बताइएको छ ।

उक्त यान पश्चिमी फ्लोरिडाको पेन्साकोलाको तटको दक्षिण तर्फ रहेको गल्फ अफ मेक्सिकोमा अवतरण गरे लगत्तै उनीहरूलाई त्यसबाट निकाल्न उद्धारका लागि तयार पारिएको पानीजहाज पुगेको थियो।

‘स्पेस एक्स र नासाको टोलीका तर्फबाट पृथ्वीमा पुनः स्वागत छ। स्पेस एक्समा उडाउनु भएकोमा धन्यवाद,’ स्पेस एक्स मिसन कन्ट्रोलले अवतरणपछिको सन्देशमा भनेको थियो । अवतरणपछि अन्तरिक्षयात्रीहरूलाई चिकित्सकहरूको टोलीले परीक्षण गरेका थिए।