काठमाडौं – चीनले दक्षिण-पश्चिमी सहर छेङ्दुमा रहेको अमेरिकी वाणिज्य दूतावास बन्द गर्न निर्देशन दिएको छ।

यसअघि अमेरिकाले टेक्ससको ह्यूस्टनस्थित चीनको वाणिज्य दूतावास शुक्रवारसम्म बन्द गर्न निर्देशन दिएको थियो । त्यसको प्रत्युत्तरमा चीनले यस्तो निर्णय गरेको हो।

अमेरिकाले आफ्नो वाणिज्य दूतावास बन्द गर्न निर्देशन दिएपछि बेइजिङले यसलाई राजनीतिक उक्साहटपूर्ण भन्दै विरोध जनाएको थियो । तर, अमेरिकी विदेश मन्त्रालयले बौद्धिक सम्पत्तिको रक्षाका निम्ति उक्त कदम चालिएको बताएको थियो ।

पछिल्लो समय चीन र अमेरिकाबीच तनावपूर्ण अवस्थाको सिर्जना भएको छ । अमेरिकी राष्ट्रपति डोनल्ड ट्रम्पको प्रशासनले व्यापार र कोरोनाभाइरस महामारी लगायतका विषयलाई लिएर चीनमाथि आरोप लगाउँदै आएको छ ।