सिन्धुपाल्चोक- नेपाल तरुण दल सिन्धुपाल्चोकले भोटेकोसी र बाह्रबिसेका बाढी पहिरो पीडितलाई खाद्यान्न र नगद राहत वितरण गरेको छ ।

कोदारी र फुल्पिङमा रहेका एक सय पीडितलाई सय बोरा चामल, ७४ थान त्रिपाल र पहिरोमा परेर मृत्यु भएका परिवारलाई नगद ३० हजार राहत प्रदान गरिएको तरुण दल सिन्धुपाल्चोकले जनाएको छ ।

त्यसैगरि तातोपानी भन्सार कार्यालयको एजेन्ट हलमा रहेका १९ सुत्केरी तथा गर्भवती महिला र बालबालिकालाई २० हजार नगद र हर्लिक्स वितरण गरेको छ ।

घर बारविहीन भएर अन्य कुनै विकल्प नभएका अति पीडित कोदारी निवासी सर्की शेर्पालाई नगद ३० हजार राहत दिएको तरुण दल जिल्ला अध्यक्ष दोर्जे लामाले बताए ।

कोदारी राजमार्ग बन्द भएकोले अध्यक्ष लामा नेतृत्वमा ३० युवाले खाद्य सामग्री बोकेर तातोपानी पुर्‍याएका थिए ।

त्यस्तैगरि बाह्रबिसे जम्बुका पीडितलाई ९९ हजार नगद दिएको छ । जम्बुमा विस्थापित परिवार मध्ये बिरामी, सुत्केरी तथा गर्भवती महिला र बालबालिकाको पोषणको निम्ति नगद प्रदान गरिएको हो ।

तरुण दल केन्द्रीय विभागका सदस्य पासाङ नोर्बु लामाले पनि तरुण दलको राहत कार्यक्रममा व्यक्तिगत सहयोग गरेका थिए ।