काठमाडौं– अस्ट्रेलियामा हुने तय भएको आईसीसी टी–२० विश्वकप क्रिकेट एक वर्ष पछि सरेको छ ।

सोमबार बसेको अन्तर्राष्ट्रिय क्रिकेट काउन्सिल (आईसीसी) को कार्यकारी समितिले नोबेल कोरोना भाइरस (कोभिड १९) महामारीका कारण विश्वकप क्रिकेट सार्ने निर्णय गरेको हो ।

आईसीसीले जारी गरेको विज्ञप्ति अनुसार अब आईसीसी विश्वकप २०२१ को अक्टोबरमा हुनेछ ।

अक्टोबरमा शुरु हुने प्रतियोगिताको फाइनल नोभेम्बर १४ मा हुने आइसीसीले जनाएको छ । यही वर्षको अक्टोबरमा प्रतियोगिता हुने तय थियो ।

यस्तै, २०२३ मा भारतमा हुने एकदिवसीय क्रिकेट विश्वकप पनि केही महिना पछि धकेलिएको छ ।

२०२३ को फ्रेब्रुअरीमा मार्चसम्म हुने तय भएको विश्वकप अक्टोबर नोभेम्बरका लागि सारिएको छ । कोरोना महामारीलाई ध्यानमा राख्दै विश्वकप सारिएको आईसीसीले जनाएको छ ।