काठमाडौं– नेपाली लेग स्पिनर सन्दीप लामिछाने आवद्ध टोली दिल्ली क्यापीटल्स इन्डियन प्रिमियर लिग (आईपीएल) मा पाँचौ खेलमा पराजित भएको छ । घरेलु मैदानमा पाहुना टोली सनराइजर्स हैदरावादसँग दिल्ली ५ विकेटले पराजित भयो । हैदरावादविरुद्ध कमजोर ब्याटिङ गरेको दिल्लीका बलरहरुले रन नियन्त्रण गर्न नसक्दा लगातार दोस्रो तथा लिगमा तेस्रो हार व्यहोरेको छ ।

तर, दिल्लीलाई पराजित गरेको सनराइजर्स हैदरावादले लिगमा तेस्रो जीत हात पारेको हो । घरेलु मैदानमा दिल्लीले दिएको १३० रनको लक्ष्य हैदरावादले १८ ओभर ३ बलमा ५ विकेट गुमाएर पुरा गर्‍यो ।

हैदरावादको जितमा जोनी बेर्सस्टोले आक्रामक ब्याटिङ गर्दै ४८ रन बनाए । उनले २८ बलमा ९ चौका र १ छक्का प्रहार गरे ।

यस्तै, मोहमद नाबीले अविजित १७ तथा विजय शंकरले १६ रन बनाए । डेभिड वार्नर, दिपक होडा र मनिस पाण्डेले समान १०—१० रन बनाएका थिए ।
दिल्लीका लागि सन्दीप लामिछाने, कागीसो राबडा, अक्षर पटेल, राहुल टेवाटिया र इशान्त शर्माले समान १—१ विकेट लिए । हैदरावादविरुद्ध नेपाली स्पिनर सन्दीपले किफायती बलिङ गरे। उनले ४ ओभर बलिङ गर्दै ३२ रन खर्चिएर १ विकेट लिए । हैदरावादसंगको खेलमा एक विकेट लिएका सन्दीपको आईपीएलमा विकेट संख्या ४ पुगेको छ ।

यसअघि, टस हारेर ब्याटिङ गरेको दिल्लीले पुरै २० ओभरमा ८ विकेट गुमाएर १२९ रन बनाएको थियो । दिल्लीका लागि कप्तान श्रेयस एयरले सर्वाधिक ४३ रन बनाए ।

यस्तै, दिल्लीका लागि अक्षर पटेलले अविजित २३ रन जोड्दा क्रिस मोरिसले १७ रन जोडे । शिखर धवन १२ रनमा आउट हुँदा पृथ्वी श्वाले ११ रनमात्रै जोड्न सके । हैदरावादका भुवनेश्वर कुमार, मोहमद नाबी सिद्धार्थ कउलले २—२ विकेट लिदैं दिल्लीको ब्याटिङ अर्डर समाप्त पारेका थिए । जितसंगै हैदरावादले ४ खेलमा ३ जितसँगै ६ अंकसहित शीर्ष स्थानमा उक्लिएको छ ।

तीन हार व्यहोरेको दिल्लीको २ जित निकाल्दै ४ अंक जोडेको दिल्ली पाँचौ स्थानमा रहेको छ ।