काठमाडौं – स्पेनिस ला लिगाको उपाधिबाट चुकेपछि बार्सिलोनाका कप्तान लियोनल मेस्सीले आलोचनात्मक रुपमा प्रस्तुत भएका छन् । मेस्सीले क्लबलाई नयाँ उचाई दिन सुधार गर्नु पर्ने ठाउँ धेरै रहेको बताए ।

शुक्रबार बिहान ओसासुनेसँगको पराजय पछि मेस्सी खुलेर बोलेका हुन् । उनले यो सिजनको अन्त्य यसरी हुन्छ भन्ने आफुले अपेक्षा समेत नगरेको बताए ।

बार्सिलोना ओसासुनेसँग घरेलु मैदानमै २–१ ले पराजित हुँदा रियल मड्रिडले भाल्लारियललाई २–१ हराउँदै यो सिजनको उपाधि उचाल्यो ।

बार्सिलोनाको लिगको अन्त्यतिर तुलनात्मक रुपमा आफुभन्दा कमजोर टोलीहरुसँग हार्दा लिग उपाधिबाट एक खेल बाँकी हुँदै टाढियो ।

६ पटकका वालोन डिअर विजेता मेस्सीले च्याम्पियन्स लिगमा अन्तिम १६ को दोस्रो लेगमा नापोलिसँगको खेलमा समेत आशंका व्यक्त गरेका छन् । पहिलो लेगमा बार्सिलोनाले नापोलिसँग १–१ गोल बराबरी खेलेको थियो ।

‘हामीले यो सिजनको अन्त्य यसरी हुन्छ भन्ने सोचेका थिएनौं तर, यसैगरि सम्पन्न भएको छ,’ मेस्सीले भनेका छन्, ‘हामीले कमजोर खेल्यौं, कमजोर इच्छाशक्तिका साथ खेल्यौं र आजको खेलले हाम्रो यो सिजनको शारांश बताउँछ ।’

मेस्सीले अगाडि भनेका छन्, ‘हाम्रो आफ्नै क्राइटएरिया छन् । खेलाडीबाट सुरु हुन्छ विश्वभरबाट हामीले आलोचना सहनु पर्छ । हामी बार्सिलोना हौं । हामीले सबै जित्नु पर्छ । हामीले मड्रिडलाई हेर्दैनौं । रियल मड्रिडले राम्रो खेल्यो र हामीले उसलाई धेरै अंक सहयोग गर्यौ।’

च्याम्पियन्स लिगमा अहिलेको खेलमा सुधार गर्न सकिएन भने हार निश्चित रहेको मेस्सीले बताएका छन् ।

‘यदि हामीले च्याम्पियन्स लिग जित्ने हो भने हामीले धेरै कुरा परिवर्तन गर्न जरुरी छ । यदि हामीले यहिँ खेललाई निरन्तरता दियौं भने हामीले नापोलिसँगको खेल गुमाउनु पर्नेछ,’ मेस्सीले भने ।