काठमाडौं – इंग्लिस प्रिमियर लिग फुटबलमा म्यानचेस्टर सिटीले बर्नेमाउथलाई हराएको छ ।

बुधबार राति भएको खेलमा सिटीले बर्नेमाउथलाई २-१ गोल अन्तरले पराजित गरेको हो ।

घरेलु मैदानमा सिटीलाई जीत दिलाउन डेभिड सिल्भा र ग्राबियल जिससले एक/एक गोल गरे । बर्नेमाउथका डेभिड ब्रुक्सले एक गोल फर्काए ।

खेलको छैटौं मिनेटमा सिल्भाले फ्रिकिकबाट गोल गर्दै सिटीलाई अग्रता दिलाएका थिए । ३९ औं मिनेटमा जिससले गोल गर्दा पहिलो हाफमा सिटी २-० ले अघि रह्यो ।

खेलको ८८ औं मिनेटमा बर्नेमाउथका डेभिडले एक गोल फर्काए । त्यसपछि खेलमा कुनै पनि गोल नभएपछि सिटीले खेल २-१ ले जीत्यो ।

जीतसँगै सिटीले ३६ खेलमा ७५ अंक जोडेको छ । र, सिटीले च्याम्पियन लिभरपुलसँगको अंक दूरी समेत घटाएको छ ।

शीर्ष स्थानको लिभरपुलको ९३ अंक रहेको छ । सिटी लिभरपुल भन्दा १८ अंकले पछि रहेको छ ।

हारसँगै ३१ अंकमा सीमित बर्नेमाउथ रेलिगेसनको जोखिममा पुगेको छ ।