काठमाडौं- कृषि ज्ञान केन्द्र, ललितपुरले दक्षिणकाली वडा नं.२ स्थित तरकारी ब्लक कृषि समूहलाई ३० लाख अनुदान रकम बराबरको सामाग्री आइतबार हस्तान्तरण गरेको छ। जम्मा एक करोडको कार्यक्रम भएपनि लकडाउनका कारण ६० लाख बराबरको मात्रै काम भएको कृषि ज्ञान केन्द्र, ललितपुरका प्रमुख निर्मल गदालले जानकारी दिए।

सामाग्री हस्तान्तरण कार्यक्रममा दक्षिणकालीका मेयर मोहन बस्नेत, उपमेयर बसन्ती तामाङ डंगोलको समेत उपस्थिती रहेको थियो। यस समूहमा १५ सदस्यहरु रहेका छन्।

उनीहरुले ग्रीन नेट, इन्सेक्ट नेट, बुट, कुटो, कोदालो, चादे, हसिया, भर्मी कम्पोष्ट मल, वाटर पम्प, २० हर्ष पावरको पावर टिलर, मिनिटिलर पाएका थिए। त्यसैगरी ग्सोलिक मिनिटिलर, स्प्रेयर पम्प, तरकारी बीउहरु, बिषादी, मल्टीलेयर, बास, कैची, स्टिकर विषादी, क्रेट, बुट, पाइप तथा ट्याङ्कीहरु समेत हस्तान्तरण गरिएको थियो।

दक्षिणकालीस्थित एक विद्यालयमा ती सामाग्रीहरु ज्ञान केन्द्रका प्रमुख निर्मल गदालले समूहका संयोजक शुशिला मगरलाई हस्तान्तरण गरेका थिए। कार्यक्रममा बोल्दै मेयर बस्नेतले सामाग्री वितरण गरेर मात्रै कृषि ज्ञान केन्द्रको दायित्व पुरा नहुने बताए।

समय समयमा अनुगमनगरी वितरण गरिएका सामाग्रीको सही सदुपयोग गर्नुपर्ने बताउदै उनले भने, ‘यति धेरै सामाग्री पाएपछि किसानहरुले वर्षको ४, ५ करोडको उत्पादन विक्री गर्नुपर्छ।’

त्यस्तै कृषि ज्ञान केन्द्रका प्रमुख गदालले लडडाउनका कारण ड्रप गर्न लागेको कार्यक्रम सफल बनाउन मेयर, उपमेयर तथा वडा अध्यक्ष रामचन्द्र क्षेत्रीका कारण अन्तिम अवस्थामा भएपनि सञ्चालनमा आएको बताए। यो अनुदान कार्यक्रम प्रधानमन्त्री कृषि आधुनिकीकरण परियोजना, तरकारी ब्लक कार्यक्रम अन्तर्गत कृषि ज्ञान केन्द्रले वितरण गरेको हो।