काठमाडौं- जनता समाजवादी पार्टी निर्वाचन आयोगमा दर्ता भएको छ। बुधबार बसेको निर्वाचन आयोगको बैठकले पार्टी दर्ता गराउने निर्णय गरेको हो।

गएको १० वैशाखमा समाजवादी पार्टी, नेपाल र राष्ट्रिय जनता पार्टी (राजपा) बीच एकीकरण भएको थियो।

एकीकरण लगत्तै आयोगमा दल दर्ताको निवेदन परेको थियो। तर, बन्दाबन्दीका कारण आयोगमा आवश्यक प्रमाण भने २५ जेठमा मात्रै बुझाइएको थियो।

उक्त पार्टीका नेता मोहम्मद इस्तियाक राईले आयोगले दल दर्ता गर्ने निर्णय गरेको बताए। तर, प्रमाणपत्र भने दिइएको छैन। संसदको दोस्रो र तेस्रो दल एकता गरी जनता समाजवादी पार्टी बनेको छ।

अब आयोगले राजपत्रमा दल दर्ता भएको सूचना प्रकाशित गरेसँगै उक्त दल औपचारिक रुपमा दर्ता हुनेछ।