मुम्बई – फिल्म ‘जीरो’ को असफलतापछि शाहरुख खान घरमै बसिरहेका छन् । उनले नयाँ फिल्ममा काम गर्नमा खासै चासो देखाएका छैनन् ।

अब उनी नयाँ र दमदार स्किृप्ट भयो भने मात्र फिल्ममा काम गर्ने मनशायमा छन् । उनका लागि पछिल्ला केही वर्ष राम्रा रहेनन् ।

शाहरुखका केही फिल्म चलेनन् । जसले गर्दा उनलाई नम्बर वान अभिनेता पनि मान्न छोडियो । उनलाई थाहा छ, अब उनी लामो समय फिल्म क्षेत्रमा धमाका मच्चाउन सक्दैनन् ।

लकडाउनका बेलामा पनि शाहरुखले दर्जनौं स्किृप्ट पढेका छन् । तर, उनलाई धेरै स्किृप्ट चित्त बुझेको छैन ।

यतिबेला खबर आएको छ कि, शाहरुखले अब राजकुमार हिरानीसँग काम गर्दैछन् ।

हिरानी बलिउडका त्यस्ता निर्देशक हुन्, जसले एकपछि अर्को हिट फिल्म दिएका छन् । फिल्म मुन्नाभाइ एमबीबीएस, थ्री इडियट्स लगायत फिल्म हिरानीले शाहरुख खानसँगै बनाउन चाहन्थे । तर, फिल्ममा शाहरुखको सट्टा अरु नै अनुबन्ध भए ।

शाहरुख खान सफलताको रथमा हुँदा उनलाई हिरानीको जरुरी पनि थिएन । तर, अब चाहन्छन् कि हिरानीसँग कुनै फिल्ममा काम गर्न पाइयोस् ।

हिरानीले निर्माण गर्न लागेको फिल्मको कथा वैदेशिक रोजगारीको कहानीमा आधारित छ । पञ्जाबबाट कैयन् युवा क्यानडा गएका छन् ।

जसकारण क्यानडा अब मिनी पञ्जाब भइसकेको छ । युवती पनि क्यानडामा हुने युवकसँगै बिहे गर्न चाहन्छन् ।

यस्तै कथामा हिरानीले फिल्म निर्माण गर्न लागेको चर्चा बलिउडमा छ । जुन फिल्मको शीर्ष भूमिकामा शाहरुख खान हुनेछन् ।

फिल्मको स्किृप्टलाई अन्तिम रुप दिइँदैछ । त्यसपछि शाहरुख र हिरानीले भेट गर्नेछन् । अहिले फिल्मको लोकेशनको खोजी भइरहेको जनाइएको छ ।