काठमाडौँ- नेपाली कांग्रेसका युवा नेता गगन थापाले कांग्रेससँगको सामिप्यता देखाएर नेकपा भित्रको गुट विवादमा एकले अर्कोलाई तर्साउने काम बन्द गर्न चेतावनी दिएका छन् ।

प्रधानमन्त्री केपी शर्मा ओलीले कांग्रेस सभापति शेरबहादुर देउवासँग सहयोग मागेको र विभिन्न मन्त्रालय अफर गरेको भन्ने चर्चा चलिरहेका बेला युवा नेता थापाको यस्तो टिप्पणी आएको हो ।

‘जनताले ५ वर्ष नेकपालाई सरकार चलाउन र कांग्रेसलाई सवल प्रतिपक्षीय भूमिकामा रहने म्याण्डेट दिएका हुन्,’ सामाजिक संजालमा थापाले लेखेका छन्, ‘यसमा हामी स्पष्ट छौं। कांग्रेससँगको सामिप्यता देखाएर नेकपा भित्रको गुटको विवादमा एक अर्कालाई तर्साउने धन्दामा लाग्नु मतादेशको अबमुल्यन हो। प्रवृति फेर,धन्दा छोड।’

यसैबीच नेपाली कांग्रेसका प्रवक्ता विश्वप्रकाश शर्माले सत्तारुढ नेपाल कम्युनिस्ट पार्टी (नेकपा) को आन्तरिक विवादमा कांग्रेस निरपेक्ष रहेको बताएका छन् ।

आइतबार बसेको केन्द्रीय कार्यसमिति बैठकपछि उनले कांग्रेस सत्तारूढ नेकपाको आन्तरिक द्वन्द्वसँग पूर्णतः निरपेक्ष रहेको बताएका हुन् ।

उनले ट्विटरमा लेखेका छन्-  “नेपाली कांग्रेस सत्तारूढ नेकपाको आन्तरिक द्वन्द्वसँग पूर्णतः निरपेक्ष छ । कसैलाई कुनै भ्रम नरहोस्– कांग्रेसले कसैलाई पनि हरियो झण्डा देखाएको छैन !,”