काठमाडौं – सत्तारुढ दल नेकपाभित्रको विवादले सरकार परिवर्तनको चर्चा चुलिएका बेला प्रमुख विपक्षी नेपाली कांग्रेसको केन्द्रीय कार्यसमितिको बैठक आज बस्दैछ ।

दिउँसो २ बजेपछि सानेपास्थित पार्टी केन्द्रीय कार्यालयमा बस्ने बैठकमा प्रधानमन्त्री केपी शर्मा ओली र सभापति शेरबहादुर देउवाबीच तीन दिनअघि बालुवाटारमा भएको गोप्य भेटघाटको विषयमा पनि छलफल हुने एक केन्द्रीय सदस्यले जानकारी दिए ।

देउवा र ओलीबीच असार १७ गते राति बालुवाटारमा करिब डेढ घण्टा गोप्य छलफल भएको थियो । उक्त भेटमा सत्तासमीकरणको विषयमा छलफल भएको अनुमान गरिदैँ आएको छ ।

कांग्रेसका केही नेताहरूले संवैधानिक निकायमा रिक्त रहेका पदाधिकारी पदपूर्तिको विषयमा उक्त भेटघाट भएको बताउँदै आए पनि सबै पक्ष त्यसमा विश्वस्त हुन सकेका छैनन् ।

यस्तै आजको बैठकमा अन्य समसामयिक राजनीतिक परिस्थिति र पार्टीको १४औं महाधिवेशनको कार्यतालिकाबारे छलफल हुने जनाइएको छ ।

यसअघि कांग्रेस पदाधिकारी बैठकले १४ औं महाधिवेशन आगामी फागुन ७ देखि १० गतेसम्म काठमाडौंमा गर्ने निर्णय गर्दै कार्यतालिका पनि तयार पारेको थियो । सो कार्यतालिकालाई केन्द्रीय समितिले अन्तिम रुप दिने छ ।