सुर्खेत- जिल्ला प्रशासन कार्यालय सुर्खेतले क्वारेन्टाइनको रूपमा प्रयोग गरिएका सरकारी तथा सामुदायिक विद्यालयहरूको विकल्प खोज्न थालेको छ।

प्रमुख जिल्ला अधिकारी हीरालाल रेग्मीको अध्यक्षतामा बसेको जिल्ला विपद् व्यवस्थापन समितिको बैठकले कोरोना क्वारेन्टाइनका कारण बालबालिकाको पठनपाठनमा बाधा हुनेप्रति ध्यान दिँदै विकल्प खोज्न थालिएको कार्यालयका सूचना अधिकारी पदमलाल लामिछानेले बताए।

“बैठकले भारत, तेस्रो मुलुकलगायत अन्य जिल्लाबाट मानिस आउने क्रम केही कमी भएपनि हालसम्म नरोकिएको र कोरोनाको सङ्क्रमणसमेत नियन्त्रणमा आउन नसकेकाले उच्च सावधानी अपनाउनुपर्नेमा जोड दिएको छ”, उनले भने, “मूलतः सुरक्षा व्यवस्थामा सहजता ल्याउन र विद्यालयमा रहेका क्वारेन्टाइनलाई पालिकास्तरमा एकीकृतरूपमा सञ्चालन गर्ने व्यवस्था मिलाउनेतर्फ जोड दिइएको छ।”

क्वारेन्टाइनमा बस्नेहरूको सङ्ख्या क्रमशः घट्दै गइरहेकाले सम्भव भएसम्म अन्य भवनको प्रयोग गरी विद्यालयमा पठनपाठन निरन्तरता दिन वातावरण मिलाउँदै जाने निर्णय गरिएको लामिछानेले बताए।

सुर्खेतका आधारभूत विद्यालयदेखि विश्वविद्यालय गरेर १७५ शैक्षिक संस्थामा क्वारेन्टाइन सञ्चालनमा छन्। भारतबाट आएका यस जिल्लाका १४ हजार ८१९ जना मध्ये ती क्वारेन्टाइनहरूमा १२ हजार ८७० नागरिक बसेका छन्।