काठमाडौं – मास्कको प्रयोगलाई लिएर चर्को आलोचना गर्दै आएका अमेरिकी राष्ट्रपति डोनाल्ड ट्रम्पले आफ्नो बोली फेरेका छन् ।

कोरोना भाइरसको महामारी नियन्त्रण बाहिर गइरहदा पनि मास्कको प्रयोग नगर्ने बताउँदै आएका ट्रम्पले आफू पनि मास्क प्रयोगकको पक्षमा नै रहेको बताएका हुन् ।

एक शीर्ष रिपब्लिकनले उदाहरणका रुपमा मास्क लगाउन ट्रम्पलाई सुझाव दिएको भोलिपल्ट फक्स न्यूजसँग कुरा गर्दै ट्रम्पले अति भिड भएको स्थानमा आफूले पनि मास्क लगाउने बताएका हुन् ।

‘म जहिले पनि मास्कको पक्षमा छु । यदी म मानिसहरुको भिड हुने स्थानमा पुगे भने मास्क लगाउने छु,’ ट्रम्पले भने ।

आफूले यसअघि पनि एकपटक मास्क लगाएको र त्यो मानिसहरुले देखेको ट्रम्पले बताएका छन् ।

ट्रम्पले बुधबारको अन्तर्वार्तामा सार्वजनिक रुपमा मास्क लगाउन आफूलाई कुनै समस्या नरहेको र मास्क लगाउने आफू राम्रो देखिने पनि बताए ।

अमेरिकामा संक्रमणले तीव्र रुप लिइसक्दासमेत ट्रम्प विज्ञहरुको सुझावसमेत नमानिरहँदा उनको पछिल्लो अभिव्यक्ति सार्वजनिक भएको हो ।