भैरहवा– अर्थमन्त्री डा.युवराज खतिवडाले आउँदो आर्थिक बर्ष २०७६/७७ को बजेटमा उद्योग  व्यवसाय क्षेत्र विशेष प्राथमिकतामा रहने बताएका छन् । उनले बजेटमा उद्योग व्यवसाय र व्यवसायीहरुको हितका लागि विभिन्न प्राबधानहरु समेटिने बताएका हुन् ।

अर्थ मन्त्रालय राजस्व समितीद्वारा भैरहवामा आयोजित प्रदेश पाँचका उद्योगी व्यवसायीसँग छलफल गर्दै अर्थमन्त्री खतिवडाले आगामी बजेट उद्योग, व्यवसाय र लगानीमैत्री हुने दाबी गरे ।

उद्योग व्यवसाय क्षेत्रको विकासविना आर्थिक समृद्धि सम्भव नहुने प्रष्ट पार्दै अर्थमन्त्री खतिवडाले कार्यक्रममा सहभागी उद्योगी व्यवसायीलाई उद्योग व्यवसाय ऐनमा समेत आमूल परिवर्तन गरिने आश्वासन दिए ।

आउँदो आर्थिक वर्षका लागी बजेट सम्बन्धी छलफल कार्यक्रममा अर्थमन्त्री खतिवडाले भन्सार र आन्तरिक राजस्वमा करको दरहरु घटाउदै लैजानु प्रत्युत्पादक हुने भन्दै करको दर घट्न नहुने तर्क गरे ।  उनले भ्याटमा बहुदर पनि आवश्यक नहुने टिप्पणी गरे ।

मन्त्री खतिवडाले  बुद्ध जन्मस्थल, निर्माणाधीन गौतमबुद्ध अन्तर्राष्ट्रिय विमानस्थल यसै प्रदेशमा रहकोले सम्वृद्धिको संवाहक पनि प्रदेश ५ रहेको उल्लेख गरे ।

पूर्व बजेट छलफल कार्यक्रममा प्रदेश ५ का उद्योग बाणिज्य संघका प्रतिनिधि तथा उद्योगी व्यवसायीहरुको सहभागिता रहेको थियो ।