अमेरिका – मार्भल फिल्म एभेन्जर इन्ड गेमलाई लिएर दर्शकमा निकै चासो छ । यतिबेला अर्को चासो बनेको छ प्रियंका चोपडा सुपरहिरो हुने विषय । भारतीय मिडियाका अनुसार प्रियंका चोपडाले मार्भल सिरिजको एक फिल्ममा सुपरहिरोको भूमिका निभाउने सम्भावना छ ।

यो फिल्मका लागि भारतका म्युजिक निर्देशक ए आर रहमानले हिन्दी भर्सनका लागि गीत तयार गर्दै गरेको पनि बताइएको छ । फिल्मका निर्देशक जो रुसोले भारत आएका बेला रहमानलाई भेट गरेका थिए ।

योसँगै खबर आएको छ कि, निर्देशक रुसोले बलिउड अभिनेत्री प्रियंका चोपडालाई पनि एक कन्ट्रयाक साइन गर्दैछन् । रुसोले प्रियंका चोपडासँग कुरा गरिरहेको भारतीय मिडियाले लेखेका छन् ।

प्रियंकाले फिल्ममा काम गर्ने सम्भावना बढी भएको बताइएको छ । रुसोले एक कार्यक्रममा प्रियंकासँग काम गर्ने रहर भएको पनि खुलासा गरेका थिए । मार्भलको कुनै एउटा सुपरहिरो फिल्ममा प्रियंकाले अभिनय गर्न सक्ने बताइएको छ ।

यदि यस्तो भयो भने यो भारतीय दर्शकका लागि पनि खुशीको कुरा हुनेछ । नेपालमा भएका प्रियंकाका फ्यानका लागि पनि खुशीको विषय हुनेछ ।

हालै मार्भलले आफ्नो कमिक बूकको सुपरहिरो कमाला खानको स्किृनमा ल्याउने बताएको थियो । त्यतिबेला मार्भलका फ्यानले प्रियंका चोपडालाई सिफारिस गरेका थिए ।