काठमाडौं- प्रधानमन्त्री केपी शर्मा ओली र दक्षिण एसियाली क्षेत्रीय सहयोग संगठन (सार्क) का नवनियुक्त महासचिव इसला रुवान विराकोनबीच भेटवार्ता भएको छ ।

सोमबार प्रधानमन्त्री निवास बालुवाटारमा भेटवार्ता भएको हो । भेटमा प्रधानमन्त्री ओलीले सार्कको १९ औं शिखर सम्मेलन छिटो गर्नु पर्नेमा जोड दिएका छन् ।

उनले सार्कको १९ औं शिखर सम्मेलन गर्न नेपालले अध्यक्षको हैसियतमा निरन्तर प्रयास र परामर्श गरिरहेको बताएका छन् ।

दुई/दुई वर्षमा हुनुपर्ने सार्क शिखर सम्मेलन नेपालले सन् २०१४ मा काठमाडौंमा आयोजना गरेयता हुन सकेको छैन  । सार्कको १९ औं शिखर सम्मेलन पाकिस्तानमा हुने भनिए पनि भारतले नमानेपछि अवरुद्ध भएको हो ।

भेटमा आफ्नो नियुक्तिका लागि नेपालले गरेको सहयोगप्रति धन्यवाद व्यक्त गर्दै सार्क महासचिवले कोरोना भाइरस रोकथाम र नियन्त्रणका लागि सार्क सचिवालयले खेलिरहेको भूमिकाबारे सार्कका अध्यक्ष तथा प्रधानमन्त्री ओलीलाई जानकारी गराएका थिए ।