काठमाडौं- नेपाल कम्युनिष्ट पार्टीका सांसद प्रभु साहले किसानलाई दिनुपर्ने मलमा आर्थिक चलखेल गरेर व्यापारीलाई दिइएको आरोप लगाएका छन् ।

नेकपा प्रदेश नम्बर २ का अध्यक्ष समेत रहेका सांसद साहले आइतबार बसेको प्रतिनिधि सभाको बैठकमा विशेष समयमा बोल्दै बजारमा मल अभाव भएको बेला सहुलियत अनुदानमा किसानलाई सरकारले दिनुपर्ने मल व्यापारिक पसलमा पठाइएको बताएका हुन् ।

उनले पहुँच, लेनदेन र कमिसनको बलमा बिचौलियाले जिम्मेवार निकाय कृषि सामाग्री कम्पनी र साल्ट ट्रेडिङबाट मल लिएको भन्दै रुलिङ गर्न सभामुखलाई आग्रह गरे ।

“अहिले धान रोपाइँको सिजनमा किसानहरुले मल पाइरहेको छैनन् । मलको पुरै अभाव छ, ७ सय रुपैयाँमा प्रतिबोरा पाइने युरिया मल हजार रुपैयाँमा समेत मुस्किलले पाइराखेको छ, २१ सयमा पाइने डीएपी मल अहिले प्रतिबोरा ३ हजारमा मुस्किलले पाइराखेको छ । सहकारी डीपोमा पाउने भनिएको मल पसल पसलमा छ ।” उनले भने, “हामी जान्न चाहन्छौं, सरकारी संयन्त्रमार्फत हुने यो विक्री वितरणको कार्य कसरी पसलमा पुग्यो ?”

मन्त्रीको ध्यानाकर्षण गराउदै उनले थपे, “कृषि सामाग्री कम्पनी र सालट ट्रेडिङ जो नेपाल सरकारको स्वामित्वमा छन्, उसले जिम्मा लिएको यो कार्यमा पूरै अनियमितता र कालोबजारी भएको छ ।  कृषियोग्य जग्गाको क्षेत्रफलको आधारमा प्रदेशहरु र स्थानीय तहहरुलाई बाड्नुपर्ने मल सेटिङ, भनसुन र कमिसनको आधारमा सहकारी र किसानको हातमा जानुको सट्टा व्यापारीको हातमा पुगेको छ ।”

सरकारको अर्बौ लगानी भएको अनुदान रकमको दुरुपयोग भएको भन्दै उनले सभामुखलाई रुलिङ गर्न आग्रह गरे ।

बैठकमा सांसद साहले स्थानीय तहमा अनावश्यक सरुवा गरेर संघीय मामिला तथा सामान्य प्रशासन मन्त्री हृदयेश त्रिपाठीले अस्थिरता मच्चाउन खोजेको भन्दै सरकारको ध्यानाकर्षण समेत गराएका थिए ।