बर्लिन– रुसको दोश्रो सबैभन्दा ठूलो हवाई सेवा प्रदायक कम्पनी एस ७ की सह सञ्चालिक तथा अध्यक्ष नटालिया फेइलेभाको विमान दुर्घटनामा मृत्यु भएको छ । जर्मनीको फ्राङ्कफर्ट शहरमा उनी चढेको निजी विमान दुर्घटना हुँदा उनकाे मृत्यु भएको हो ।

सञ्चालिका नटालियासहित दुई यात्रु र एक पाइलट सवार एपिक एलटी विमान फ्राङ्कफर्टको इलेबाख विमानस्थलनजिक दुर्घटनाग्रस्त भएको थियो ।

विमान फ्रान्सको कान शहरबाट उडेको विमानमा सवार अन्य दुईको पनि मृत्यु भएको स्थानीय अधिकारीलाई उद्धृत गर्दै जर्मन सञ्चारमाध्यमले जनाएका छन् ।

६० करोड अमेरिकी डलरभन्दा धेरैको सम्पत्ति रहेकी फेइलेभा रुसकी सबैभन्दा धनाढ्य महिलाको सूचीमा आउने समेत बताइन्छ ।
रुसी र अन्तर्राष्ट्रिय अनुसन्धानकर्ताहरुले दुर्घटनाबारे अनुसन्धान शुरु गरिसकेको बताइएको छ ।

साइबेरियन एयर पनि भनिने हवाई सेवा प्रदायक कम्पनी एस ७ ले दुर्घटना हुनुको कारणबारे स्पष्ट भइनसकेको जनाएको छ । २६ मुलुकका १ सय ८१ शहरमा ९६ विमानमार्फत् हवाई सेवा दिँदै अएको साइबेरियन एयर रुसको सबैभन्दा ठूलो हवाई सेवा कम्पनी एरोलफ्ट पछिको दोश्रो ठूलो विमान सेवा प्रदायक कम्पनी हो ।