काठमाडौँ – कोरोना भाइरसको महामारी अप्ठ्यारोमा परेका बंगादेशका नेपालीलाई आगामी आइतबारदेखि स्वदेश फर्काउन शुरू गरिने भएको छ ।

ढाकास्थित नेपाली दूतावासका अनुसार बुधबार बिहानसम्म बंगलादेशमा रहेकामध्ये २९ जना नेपाली स्वदेश फर्किनका लागि पहिलो प्राथमिकतामा परेका छन् ।

दूतावासले जारी गरेको सूचना अनुसार गम्भीर स्वास्थ्य अवस्था भएका, सुत्केरी तथा गर्भवती, बालबालिका र ज्येष्ठ नागरिक, अध्ययन समाप्त भएक विद्यार्थी, पारिवारिक पुनर्मिलनमा आएकाहरू तथा पर्यटककारूपमा बंगलादेशमा पुगेर अलपत्र परेका नेपालीहरूलाई प्राथिमिकतामा राखिएको छ ।

नेपाल फर्किन चाहनेहरुले आफ्नो विमान खर्च र फर्केपछि क्वारेन्टाइनमा बस्दा लाग्ने सम्पूर्ण खर्च स्वयंले व्यहोर्नुपर्ने छ ।

नेपाल आउनका लागि विमान भाडा १६५ अमेरिकी डलर अर्थात १४००० टाका (१९,९५८ नेपाली रुपैयाँ) लाग्ने पनि दूतावासले प्रष्ट पारेको छ । आइतबार नेपाल एयरलाइन्सको विमानले ढाकामा रहेका नेपाली काठमाडौँ ल्याउनेछ ।