काठमाडौं – शारीरिक सम्पर्क (फिजिकल कन्ट्याक्ट)कम हुने खेल टेबल टेनिस, आर्चरी र ब्याडमिन्टन खेलको अभ्यास सुरु गरिसकेको दाबी गरेका राष्ट्रिय खेलकुद परिषद् (राखेप) सदस्य सचिव रमेश कुमार सिलवालले गलत सूचना सम्प्रेषण गरेको पाइएको छ ।

सामाजिक सञ्जाल मार्फत गरिएको लाइभ अन्तरवार्तामा उनले भनेका छन्, ‘केही दिन अगाडिदेखि मैले व्यक्तिगत स्पर्धाका खेलहरुको अभ्यास सुरु गरेको छु । फिजिकल कन्ट्याक्ट नभएका खेलहरु जस्तो, टेबुल टेनिस, ब्याडमिन्टन, आर्चरी जस्ता खेलका अभ्यास सुरु गरेको छौं ।’ उनलाई खेलाडीको अभ्यास कहिले सुरु हुन्छ भनेर प्रश्न गरिएको थियो ।

उनले अभ्यास सुरु गरेको दाबी गरेपनि कुनै पनि खेल सुरु भएको छैन । सदस्यसचिव सिलवालले मिति तय नगरि केही दिन अगाडिदेखि अभ्यास सुरु भएको बताएपनि सम्बन्धित खेल संघका पदाधिकारीहरु भने यस विषयमा जानकार छैनन् ।

सदस्य सचिव सिलवालले भनेका तीन संघ टेबल टेनिस, आर्चरी र ब्याडमिन्टनका अध्यक्षहरुले अहिलेसम्म अभ्यास सुरु नभएको प्रष्ट पारेका छन् ।

खबरहबले टेबलटेनिस संघका अध्यक्ष चतुरानन्द वैध, आर्चरीका अध्यक्ष दीपक गुरुङ र ब्याडमिन्टनका अध्यक्ष रामजीबहादुर श्रेष्ठसँग कुरा गर्दा सदस्य सचिवको अभिव्यक्ति तथ्यहिन भएको पाइएको हो ।

दिपक गुरुङ, आर्चरी अध्यक्ष

हामीलाई खबरै भएको छैन । अहिले हाम्रो आफ्नै मैदान हुन्थ्यो भने यसअघि नै अभ्यास सुरु गराइसक्थ्यौं । तर, आफ्नो मैदान नहुँदा समस्या भयो । अहिले सशस्त्र र आर्मीको मैदान माग्दा लकडाउन खुल्न दिनुस् भन्छन् । अहिले मैले खेलाडीलाई मनोवैज्ञानिक रुपमा फिट रहन निर्देशन दिएको छु ।

चतुरानन्द वैध, अध्यक्ष टेबल टेनिस

अभ्यासमा छिट्टै सुरु गर्ने तयारी भइरहेको छ । यस्तो समयमा कसरी, कति जना खेलाडीलाई अभ्यासमा बोलाउने भन्ने कुनै मापदण्ड बनिसकेको छैन । त्यसैलाई कुरिरहेका छौं ।

टेबल टेनिसमा अहिले मुख्य प्रशिक्षक पनि छैनन् । टेनिसमा बल समात्नु पर्यो, ब्याट समात्नु पर्यो यस्ता कुराहरु सरकारी तहबाट स्पष्ट भए अभ्यास सुरु हुन्छ ।

रामजीबहादुर श्रेष्ठ, अध्यक्ष ब्याडमिन्टन संघ

अहिले अभ्यास सुरु भएको छैन ।

१ वर्षका लागि कोरियन प्रशिक्षक आउनु भएको छ । उहाँ आएको केही समयमै लकडाउन भएपछि राम्रोसँग अभ्यास गर्न पाएका छैनौं ।

कहिलेकाहीँ जुम एपमा कक्षा हुन्छ । कसरी फिट रहने भनेर प्रशिक्षकले सिकाउनु भएको छ । अब हामी आइतबार बाटै अभ्यास सुरु गर्ने तयारीमा छौं ।

लकडाउन भइसकेपछि पनि हामीले अभ्यास निरन्तर राखेका थियौं । तर, पछि कोरोनाको जोखिम बढ्न थाल्यो भने समस्या हुनसक्छ भन्दै संघले नै अभ्यास रोक्ने निर्णय गरेको हो । सदस्य सचिव ज्युले त्यतिबेला पनि सुरक्षित साथ अभ्यास गर्नुस् भन्नु भएको थियो ।

यस्तै, सदस्य सचिव सिलवालले मार्सलआर्ट तर्फ करातेमा काता र तेक्वान्दोको पुम्सेका खेलमा पनि अभ्यास सुरु भएको बताएका छन् । लकडाउनकै क्रममा काता र पुम्सेका केही राष्ट्रिय तथा अन्तर्राष्ट्रिय अनलाइन प्रतियोगिता भएका थिए । त्यसैलाई अभ्यासका रुपमा विश्लेषण गरेको हुनसक्ने एक प्रशिक्षकले बताए ।

‘खेलाडीहरुले आफ्नै तरिकाले अभ्यास गरिरहेका छन् । केही अनलाइन खेलमा सहभागी हुँदा सदस्यसचिवले त्यसैलाई अभ्यास भन्दै प्रचार गर्नुभएछ,’ ती प्रशिक्षकले भने ।