काठमाडौं– कतार सरकारले भारतका मुख्य दुई शहरमा भिसा सेन्टर स्थापना गरेको छ ।

कतार सरकारले भारतमा पहिलो कतार भिसा सेन्टर (क्युभीसी) भारतको राजधानी नयाँदिल्लीमा यही मार्च २७ मा शुरु गरेको छ । भने २९ मार्चमा मुम्बईमा पनि भिसा सेन्टर खोली सेन्टरले सेवा शुरु गरेको छ ।

कतारका आन्तरिक मामिला मन्त्रालय अन्तरगत रहेको भिसा सपोर्ट सेन्टर कतारको कार्यकारी निर्देशक मेजर अब्दुल्लाह खलिफा अल मोहन्नदी सहित दुवै देशका अन्य उच्च पदाधिकारीहरूको उपस्थितिमा कतार भिषा सेन्टरको उद्घाटन गरिएको थियो ।

कतारले भारतका अन्य शहरहरु कलकत्ता, लखनउ, हैदराबाद, चेन्नइ र कोचीमा गरी पाँच थप भिषा सेन्टरहरू छिटै शुरु गर्ने कतार भिसा सेन्टरका तयारीका साथ काम भइरहेको जनाएको छ । कतार सरकारले भिसा सेन्टर श्रीलंका, बङ्गलादेश र पाकिस्तानमा स्थापना गरिसकेको छ ।

कतार सरकारले रोजगारीका लागि आफना देश आउने नागरिकको फिंगर प्रिन्ट, बायोमेट्रिक (जैविक) विवरण अभिलेख, मेडिकल चेकअप र रोजगारी सम्झौतापत्रमा हस्ताक्षर जस्ता कामहरू सहजरुपमा आफ्नै (स्वदेश) देशबाटै गर्न पूर्णरुपमा गरि भिसा सेन्टर खोल्न योजना लिएको छ ।

यस्तै, कतारले अब छिट्टै नेपालमा पनि कतार भिसा सेन्टर (क्युभीसी) शुरु गर्न लागेको छ । काठमाडौँ महाराजगन्जमा कतार भिसा सेन्टरको लागि कार्यालय समेत स्थापना भइसकेको छ । कतारसँग हुन लागेको श्रम सम्झौतामा भिसा सेन्टर खोल्ने विषयमा छलफल भएको छ । आगामी महिना कतारसँग श्रम सम्झौता हस्ताक्षर हुदै छ ।