काठमाडौं- प्रमुख प्रतिपक्षी दल नेपाली कांग्रेसले सरकार अधिनायकवादी बन्दै गएको भन्दै सोमबार देशभर विरोधका कार्यक्रम गर्दैछ । सरकार निरंकुशतातर्फ अघि बढेकोले सच्याउन कांगेसले आन्दोलनका कार्यक्रम तय गरेको हो ।

देशभरका ७७ वटै जिल्लामा सरकारका विरुद्ध प्रदर्शन गर्न लागेको कांग्रेसले जानकारी दिएको छ । विरोध प्रदर्शनका लागि सम्पूर्ण तयारी पूरा भई कार्यक्रम सुरु हुन लागेको बताइएको छ।

डा. गोविन्द केसीसँगको सम्झौता विपरित चिकित्सा शिक्षा विधेयक पारित गरेको, निर्मला पन्तका हत्यारा पक्राउ गर्न नसकेको र प्रतिपक्षलाई वास्ता नगरेको जस्ता आरोप लगाउँदै कांग्रेसले विरोध प्रदर्शन गर्न लागेको हो ।

कांग्रेसले सदनमा सत्तापक्षले प्रतिपक्षसँग देखाएको व्यवहारको बदला सडकबाट लिने चेतावनी दिएको छ ।

तर यता सत्तारुढ दलका नेताहरुले भने यतिबेला आन्दोलन तथा प्रदर्शन गरेर सरकारको कामलाई प्रभावित पार्न नहुने प्रतिक्रिया दिएका छन्। पाँच वर्ष सत्तामा रहने जनादेश पाएको सरकारलाई काम गर्न नदिने वातावरण सृजना गर्न नहुने उनीहरुले तर्क गर्दै आएका छन्।