काठमाडौं- राष्ट्रपति विद्यादेवी भण्डारीले विश्व वातावरण दिवसका अवसरमा राष्ट्रपति कार्यालय, शीतल निवास परिसरमा आज अपराह्न वृक्षारोपण गरेकी छिन् ।

दिवसको अवसरमा शीतल निवास परिसरमा वरपीपल एवं फलफूलका गरी करीब १५० बिरुवा रोपिएको जनाइएको छ ।

यसैबीच दिवसकै अवसरमा मानव अधिकार तथा शान्ति समाज काठमाडौँ शाखाले गोठाटारको पुलसँगैको नदी किनारमा सफाइ गरेको छ ।

नदी किनारका साथै कपुर उद्यानमा सरसफाइ गरिएको सचिव ईश्वर पुडासैनीले बताए ।

वातावरण संरक्षणका लागि प्रत्येक वर्ष दिवसको अवसर पारेर जुन ५ तारिखका दिन समाजले सफाइ, वृक्षारोपणलगायत कार्यक्रम गर्दै आएको छ ।

यस वर्ष कोरोना भाइरसको सङ्क्रमणबाट बच्न जारी बन्दाबन्दीका कारण सामाजिक दूरी कायम गरी निश्चित मानिसले मात्र निरन्तरतास्वरुप कार्यक्रम गरिएको पनि उनले बताए ।

दिवसकै अवसरमा समाजको बाँके शाखाले आज आयोजना गरेको बाँकेस्थित हिन्दू श्मसान भूमिमा नीम, पिपल, सिसम, तुलसी, मसला, सागोन, अमला, जामुनलगायत बिरुवा रोपिएको जनाइएको छ ।

रुपन्देही शाखाको आयोजनामा आज बिहान बुटवलको ग्लोबल पिस पार्कमा वृक्षारोपण कार्यक्रम गरिएको समाजका कार्यक्रम अधिकृत सरिता पौडेलले बताइन् ।