काठमाडौं- कोरोना भाइरस संक्रमित बढेसँगै दैलेखका दुई नगरपालिकामा निषेधाज्ञा जारी गरिएको छ ।

कोरोना भाइरसको संक्रमण फैलिन नदिन दैलेख प्रशासनले शुक्रबार साँझ ६ बजेदेखि लागू हुनेगरी नारायण नगरपालिका र दुल्लु नगरपालिकामा अनिश्चितकालीन निषेधाज्ञा जारी गरेको हो ।

भारतबाट आउनेको संख्या र संक्रमित बढ्न थालेपछि थप जोखिम बढ्न नदिन निषेधाज्ञा जारी गरिएको प्रमुख जिल्ला अधिकारी युवराज कट्टेलले बताए ।

राजपत्रमा उल्लेख भएका अत्यावश्य सेवाबाहेकका अन्य कामहरु नगर्न प्रशासनले आदेश दिएको छ । नारायण नगरपालिकाको सम्पूर्ण सिमाना र दुल्लु नगरपालिकाको कर्णाली राजमार्ग छुने विभिन्न नाकामा निषेधित क्षेत्र तोकिएको छ।

दैलेखमा शुक्रबारमात्रै ९१ जनामा कोरोना संक्रमित थपिएका छन् योसँगै संक्रमितको संख्या ३ सय ८ पुगेको छ भने एक जनाको मृत्यु भएको छ।