कैलाली– कोरोना संक्रमणको जोखिम बढेपनि प्रयोगशालाको क्षमता वृद्धि नहुँदा सुदूरपश्चिममा कोभिड १९ परीक्षण गर्न संकलन गरिएका करिब आठ सय जनाको थ्रोट स्वाबका नमूनाहरू प्रयोगशालामै थन्किएका छन् ।

स्थानीय तह आफैंले भीटीएम किट खरिद गरी नमूना संकलन गरेर धनगढीस्थित प्रयोगशालामा पठाइरहेका छन् । क्षमताभन्दा तीन गुणा बढी नमूनाहरू परीक्षण गराउन ल्याएपछि प्रयोगशालामै थन्किएका छन् ।

सुदूरपश्चिम प्रदेशमा स्थापित प्रयोगशालाबाट आएका ८ सय बढी नमूना परीक्षण गर्न कम्तिमा ४ दिन लाग्छ । तर, त्यो बेलासम्म योभन्दा बढी नमूना आउने जनाइएको छ । कोरोनाको परीक्षण हुने धनगढीस्थित पशु रोग अन्वेषण प्रयोगशालाले दिनभरीमा बढीमा २५० नमूना मात्रै परीक्षण गर्नसक्ने प्रयोगशाला इन्चार्ज रमेश शाहीले जानकारी दिए ।

प्रयोगशालाको क्षमताभन्दा बढी थ्रोट स्वाबका नमूनाहरू आएपछि समस्या भएको इन्चार्ज शाहीले बताए ।

भएको उपकरण र प्राविधकबाट परीक्षण गर्न ढिला हुँदासम्म प्रदेश सरकार जनशक्ति र उपकरण थप्नेतर्फ ध्यान दिएको छैन । सुदूरपश्चिमका स्वास्थ्य निर्देशक गुणराज अवस्थीले तीन ओटा पीसीआर मेसिन र २० ओटा भेन्टिलेटर खरीदका लागी टेन्डर भइसकेको बताएका छन् । हाल थ्रोट स्वाव नमुना संकलन तीब्र भएपनि परीक्षण सुस्त रहेको अवस्थीले बताए ।

धनगढीमा एउटै प्रयोगशाला र त्यसमा आवश्यक कर्मचारी समेत अभावका कारण परीक्षणले तिब्रता पाउन नसकेको निर्देशक अवस्थीले बताए ।

परीक्षणलाई बढाउन थप प्रयोगशाला राख्ने तथा आवश्यक जनशक्ती पुर्ती गर्ने बिषयमा निर्देशनालय केन्द्रित भएको उनले बताए ।

प्रदेश सरकारले प्रदेशका पाँच ठाउँमा प्रयोगशाला स्थापना गरेर परीक्षणलाई तिब्रता दिने निर्णय गरेपनि हालसम्म संघीय सरकारले स्थापना गरेको प्रयोगशालाबाटै परीक्षण भइरहेको छ ।

बाह्य मुलुकबाट हुलका हुल नागरिक भित्रिएर यस प्रदेशका क्वारेन्टाइनपनि भरिभराउ बनेका छन् । तर परीक्षणका लागी प्रयोगशाला अभावमा संकलन भएका नमुनापनि थन्किन थालेका हुन् । दिनेश विष्टबाट