काठमाडौं–बारा र पर्सामा हावाहुरी प्रभावित क्षेत्रमा उद्धारका लागि सुरक्षा निकायका तीनै अंग परिचालन गरिएको छ । नेपाल प्रहरी, सशस्त्र प्रहरी तथा नेपाली सेनालाई उद्धारका लागि परिचालन गरिएको छ । नेपाली सेनाका दुई बलालियन उद्धारमा खटेका छन् ।

प्रदेश २ सरकारले यो विपत घडीमा राष्ट्रिय शोक मनाउन केन्द्रीय सरकारसँग माग गरेको छ । घटनामा भएको क्षति तथा उद्दारका लागि चाल्नुपर्ने कदमका विषयमा छलफल गर्न अहिले जिल्ला प्रशासन कार्यालयमा बैठक बोलाइएको छ । बैठकमा स्थानीय जनप्रतिनिधि, केन्द्रीय तथा प्रदेशसभाका सांसदलाई बोलाइएको बारा क्षेत्र नम्बर १, ‘क’ सांसद त्रिलोकी प्रसादले खबरहबलाई जानकारी दिए ।

अहिलेसम्म प्रारम्भिक सूचनामात्र आएको भन्दै सांसद प्रसादले घटनाबाट भएको क्षति धेरै रहेको बताए । हावाहुरीले बिजुलीको पोल तथा टिनको छाना उडाएर धेरैलाई घाइते बनाएको छ । घाइतेको संख्या बढ्न थालेपछि अस्पतालको खुल्ला ठाउँमा राखेर उपचार गराईँदै गरेको अस्पतालले जनाएको छ । त्यस्तै बिरामीको उपचारका लागि रगत अभाव भएका कारण रक्तदान गर्न आह्वान गरिएको छ ।