काठमाडौं- विज्ञहरुले भारतबाट आउने सबै व्यक्तिको पीसीआर विधिबाट कोरोना परीक्षण गर्नुपर्ने बताएका छन् ।

स्वास्थ्य मन्त्रालयले लक्षण नदेखिएका व्यक्तिहरु कोरोना परीक्षण नै नगर्ने विषयमा छलफल गरिरहँदा विज्ञहरुले भारतबाट आउने सबैको कोरोना परीक्षण गर्नुपर्ने बताएका हुन् ।

शुक्रराज ट्रपिकल तथा सरुवा रोग अस्पतालका डाक्टर शेर बहादुर पुनले भारतीय सिमाबाट नेपालीहरु आउने क्रम नरोकिएकाले नेपालमा कोरोना संक्रमित अझै थपिन सक्ने बताए ।

“भारतीय सिमाबाट नेपालीहरु आउने क्रम रोकिएको छैन, त्यसैले सिमाबाट आउनेहरुलाई पीसीआरबाट कोरोना परीक्षण गरेर पोजेटिभ र नेगेटिभ भएकालाई छुट्टाछुट्टै क्वारेन्टाइनमा व्यवस्थापन गर्नुपर्छ,” डा पुनले भने, “अहिले संक्रमित बढ्दै गएको अवस्था र भारतबाट नेपालीहरु आउने क्रम नरोकिएको अवस्थालाई हेर्दा नेपालमा संक्रमितको संख्या झनै बढ्ने देखिन्छ, सरकारले यसको नियन्त्रणका लागि सोही अनुसारको तयारी गर्नुपर्छ ।”